Psalms 113
Leemi Asu Ri Lununuan At Leeme Silok
1Nedik ata emi asu mi Leeme Silok.Nemi luvuttadi gugu at Leeme Silok, mina emi asu mi laasen teren. 2I lox avukat do limixin dina emi asu min mo la at levenaleng axap i tu melamgo. 3Limixin axap boro at lavanuet mera manman at na lavatbung menemen, mina emi asu mi Leeme Silok. 4Leeme Silok mun im gomgonga mavana at larabung mixin axap, la lisisixam teren i umsu rovana at laxalibet.
5Kopmen tara i lok ngan Leeme Silok ne Moroa atdik, neni mo it kis at loxonin orong teren pana. 6La mo ik milik si ukopok ti reven lamavangkap mi lavatkangka. 7Neni ik lox axatu nedi luvuttadi banbalo basinge laxakup la iram tebeng luvuttadi pakpakes basinge laxakup at lempat balangkao, 8la irak lox asilok nedi kusu dina etangas eburu mi lavanarong at loorong, nedi di silok kantubu at limixin teren. 9Neni ik lox amenemen lodoxoma at lavakin kopmen dina pisik, la im taba nedi mi laxamdak mi laxaalik.
Ata emi asu mi Leeme Silok.
Copyright information for
MMX